Viti 2025 po mbyllet si një prej viteve më domethënëse për diplomacinë e Kosovës në periudhën e fundit. Pas një periudhe disa-vjeçare me ritëm të ulët në procesin e njohjeve ndërkombëtare, Kosova arriti të sigurojë katër njohje të reja brenda një viti, duke e çuar numrin e shteteve që e njohin në 121.

Njohja e parë e vitit erdhi në fund të marsit nga Kenia, shtet afrikan me peshë në arenën ndërkombëtare, e cila u bë vendi i 118-të që njeh pavarësinë e Kosovës. Ky sukses u bë publik nga ish-presidenti Behgjet Pacolli, i cili njoftoi se kishte qenë personalisht i angazhuar në sigurimin e njohjes. Vendimi i Kenias u kundërshtua menjëherë nga Serbia, por u konfirmua zyrtarisht dhe shënoi fundin e një stagnimi gati katërvjeçar në këtë proces. Para Kenias, shteti i fundit që kishte njohur Kosovën ishte Izraeli, në vitin 2021.

Vetëm pak ditë më vonë, Sudani njoftoi njohjen e Kosovës dhe vendosjen e marrëdhënieve diplomatike. Lajmin e bëri publik presidentja Vjosa Osmani, e cila e cilësoi këtë hap si “fillimin e një partneriteti madhështor”.

Më vonë gjatë vitit, Siria u bë shteti i tretë që njohu Kosovën, duke e çuar totalin në 120 njohje. Ky zhvillim u pa si dëshmi e një diplomacie aktive dhe të suksesshme, pavarësisht sfidave gjeopolitike dhe presioneve ndërkombëtare.

Dhe më 19 dhjetor, një surprizë tjetër historike: Bahamas e njohu Kosovën si shtet të pavarur dhe sovran, duke e bërë shtetin e 121-të që e njeh Republikën e Kosovës. Presidentja Vjosa Osmani e quajti këtë një hap të jashtëzakonshëm, që forcon pozicionin ndërkombëtar të Kosovës dhe hap dyer të reja për bashkëpunim global.

Këto katër njohje përfaqësojnë më shumë sesa shifra. Ato janë dëshmi e një rikthimi të diplomacisë aktive të Kosovës, pas një periudhe me ritëm të ulët dhe sfida të shumta në arenën ndërkombëtare. Ndërsa Kosova hyn në vitin 2026, viti që lamë pas mbetet si një pikë kthese – një vit që i riktheu Kosovës zërin dhe prezencën në skenën globale./Arbresh.info/